Zuzug-Wegzug-Zäune-Feuerschutz-Schaden durch Pferde
Item, es soll ckainer ckainen Haußgenosen ohne Erlaubtnus, Einnemmen Er habe dann dem Vogt, wie sich gebürth, Huldigung gethan bey Straff aines gulden, dem Vogt ain orth, dem Ambtcknecht fünff Creuzer, doch sollen Die Haußgenosen, So hinder Unnserm Gnd.Frst. Unnd Herrn, Herzog Philip Ludwigen, Pfalzgrafen Ziechen, darInnen nicht begrifen, Sonder Ir frstl.Gnd. gelobt unnd geschworen sein.
Item, Es soll ckainer, So hinder der Hofmarckts herrschaft gesessen auß dem Dorff oder gericht Ziechen, Er Verbürg denn seine NachRecht, hinder sich Ain Jarlang, bey Straff Zwayer gulden, dem Vogt Zechen kreüzer
Item, Es soll niemandt den Andern, An den gerten Zeun Abbrechen, stecken Unnd Zeun haimbtragen, oder ZerReisen, wer daran betretten würdt, oder sonnst glaublich Angezaigt, Ist Verfallen, Ain gulden, dem Vogt Zechen Creuzer, dem Ambtcknecht fünff Creuzer.
Item, Es soll niemandt bey der Nacht mit brennenden Spännen In die Stell geen, oder Über die gassen, bey Straff aines gulden, dem Vogt Ain orth, dem Ambtcknecht fünff Creuzer.
Item, welcher sein Ros, nicht Augenscheinlich für den Stuod trib oder Reith, Unnd dann die selben schaden thetten, So soll der, des die Roß sein den schaden Biesen, auch dem Vogt Zwen Unnd dreyssig Pfennig, Unnd dem Fluerer Zwelff Pfennig Zur Straff geben
