Item soll ein jeder wirth zue Wolfferstatt nit allein den Innwonern daselbst, sonnder menniglichem, umb sein gelt, wein und Bier geben, und Im sein Pfennig, wie sich gebürth, vergleichen. Ob er aber Jemandt feind wer, und einem wein unnd Pier, umb sein gelt, nit widerfahren haben wolt, So mag derselb ein Pfanndt auf das Vaß legen, unnd es selbst nemmen, doch mehr nicht, denn solch Pfanndt ungefehrlich werth ist.
Item, die Hofmarckherrschaft oder Ihre Verordnete Ambtleith daselbst, mögen Innerhalb Ires Hofmarckts pezirck, Irer gemein unndergehen, nach aller Irer notturfft, was aber auserhalb Ires Obgemelten Specificierten Etters, Im Landtgericht gelegen, da sollen die Undergeng Jederzeit mit eines Landtrichters Zue GraysPach vorgeherd wisen unnd Dagsazung beschechen, unnd Er von Lanndgerichts Obrigkeit weegen, wie Landtsgebrauch unnd Herkommen ist darbey sein.
Ob aber Irgenndt eine solche Unndergangen sach fürfüele, die an Ir selbs so Gring unnd Klain wer unnd es des Costens nit werth, So soll alsdann dasselb nicht minder an ein Lanndtrichter auch gebracht werden, der ein Ambtknecht hinaus schickt, dem Alsdann am thag Sechs bazen für seine müehe unnd Cost, von der verlustigten Part gegeben werden soll, der neben Hofmarcks Herrschaft Verordneten solches für zue nemmen hat, Khann nun alsdann die sachen durch dieselben güetlich hingelegt werden, So bleibt es darbei, wo nit, soll es wider an Landtrichter gelangt werden und derselb Tagsazung unnd Augenschein ansezen und nemmen, die Handtlung wie obstehet alsdann dem Lanndtsgebrauch nach vergleichen oder sonst durch gebürliche Abschidt entscheiden.
