Vorfaelle außerhalb der Hofmark-Grundstücksgrenzen-Grasen-Schäden durch Vieh
Folgt was Ausserhalb
des Hofmarckpezirks
Im Landtgericht, auf den Hofmarcks Veldern,
wisen und Gemain Flecken für fäll
zue der Hofmarckts Eehafft zue straffen zuegelassen seindt.
Wann einer dem Andern übermeet, überschneidt, über Ackert, oder Überzeint, soll zue Straf geben, dreysig Creuzer, oder ufs Maist ain Gulden, unnd dem beschedigten gebürlichen Abtrag thuen
Item, wehr dem Andern In dem seinen Zue schaden grast, sol gestraft werden, Umb zwainzig Pfennig, Unnd dem so der schaden zuegefiegt wirdt, nach der erckandtnus der Vierer Abtrag thuen.
Item, wenn Jemandt Roß oder ander Viech zue schaden lest gehen, soll von Jedem Stuck Zwelff Pfennig Straf geben, unnd sich mit dem Beschedigten nach erkanndtnus der Hofmarck herrschaft vertragen.